(ریلیف کی تقسیم اور مستحقین )
بزبان گوجری،،تحریر سکندر حنفی،
ریلیف لئ گیا دوکاندار،
روتاۓ ریا لاچار،
راشن دیتی ممبراں ناں،
کوج دیتی معتبراں ناں،
لگے گی تم ناں اذار،،،،روتاۓ ریا لاچار،،
ڈاڈا لی گیا آٹا،
پیسا لی گیا باٹا،
غریباں ناں دی کے گاڑ،،،روتاے ریا لاچار،،
میھٹر دیکھتاۓ ری گیا،
ہتیم دیکھتاۓ ری گیا،
حبا ہویا گنہگار،،،روتاۓ ریا لاچار،،
لسٹ ماں میرو ناں نیں،
غریب تھو تا ں نیں،
سڑے گو نمبردار،،،روتاۓ ریا لاچار،،
حق تھو یو مزدوراں کو،
حق تھو یو معزوراں کو،
لئ گیا کیوں ماڑدار،،،روتاۓ ریا لاچار،،
ناں میرو ناں آئیو،
راشن مکتاں ماں تاں آئیو،
واپس جاریو تحصیلدار،،،روتاۓ ریا لاچار،،
ہوۓ گو جب حساب،
کئ دیئں گا تم جواب،
ھے انصاف کی آگے ٹھار،،،روتاۓ ریا لاچار،،
خدا تے زری ڈروں،
ڈھیڈ ماں آگ ناں بھروں،
سڑ کے ہوئیں گا تم انگار،،،روتاۓ ریا لاچار،،
